احذر الحلم فيه سم قاتل

مين فينا مبيحلمش ؟؟

كل واحد فينا عنده حاجات بيحلم بيها ونفسه تبقى واقع .. اللى بيحلم بشغل ولا حب ولا فلوس ولا مركز معين نفسه يوصله .. فى النهاية كلنا بنحلم نغير الواقع - نسيت اقولها دى فى البوست اللى فات هههه - بنحلم نغير ودايما الحلم بالتغيير بيكون للأفضل

ساعات بيكون الحلم دفعة لصاحبه انه يعمل كل اللى يقدر عليه عشان يحققه .. وساعات بيكون الحلم متعة .. اهو ساعتها الواحد بيحلم وهو عارف انه مجرد بس بيعيش فى الخيال شويه وخلاص على كده .. وناس تانية الحلم بيدمرها

الحلم بيدمرك لما بيسيطر عليك .. يخليك قايم نايم نفسك توصله .. يخليك تتمعن اكتر فى تفاصيله .. تمنى نفسك بيه.. تشوف نفسكفيه .. وخاصة لو كان فيه قوة بتدفعك .. حد بيشجعك .. ويحسسك ان الحلم دا بتاعك .. دا من حقك اصلا .. هيا بس خطوة ولا خطوتين وتوصل .. بتفضل تصبر نفسك .. وتستحمل اى معاناة ممكن تحصل لك عشان توصل .. بيبقى عندك حماس وارادة تتخطى اى حواجز .. بيبقى عندك كمان امكانية التضحية بحاجات بتحبها عشان توصل لحاجة بتحبها اكتر .. قد تضحى بوقت .. بمجهود .. بفلوس .. بمشاعر .. باى حاجة عشان توصل لحاجة

ياااااه انت متخيل معايا انت قد ايه متمسك بالحلم دا .. تعمل ايه بقى لو جيت فى الاخر لاقيت انه انت مبتوصلش .. مهما بتعمل الحاجة دى مش بتاعتك .. مهما بتضحى برده مش هتاخدها .. ناس كتير تقولك عادى .. سوء اختيار .. حاول تانى .. الاحلام مبتخلصش .. اصل الحاجة دى مش نصيبك .. الفكرة ان الواحد ممكن يبقى كده بس على مدار وقت بقى .. وبعدين كفاية عليه اللى خسره من حاجات ضحي بيها ومن مشاعر تعلقه بالحاجة دى .. وبيكون من الصعب بل من الموجع نزع الحلم دا من كل تفاصيل حياتك .. ومن كل خلية فى عقلك .. ومن كل لحظة انت عشت فيها الحلم وقربت منه

شيء كمان موجع .. انك بتفقد حماسك للشيء .. ولاى شيء مرتبط بيه .. بتبقى كل البدايل بالنسبة لك سيان .. وكل الاختيارات بالنسبة لك واحدة .. وكل الطرق بتودى على طريق انت مش عاوزه .. حتى لو نجحت فيه .. فايدته ايه انك تنجح فى حاجة انت مش عاوزها ولا حاببها ... وبتفقد حماسك كمان لتجربة اى شيء جديد .. بتفقد حماسك حتي لانك تصحي الصبح مشبع بالامل وعندك حبة طاقة ممكن تعمل بيهم اى حاجة

مش هقول لاى حد متحلمش بس هقول نحذر .. ونخلى بالنا واحنا بنحلم وبنتمنى .. ومنعلقش نفسنا اوى بالحاجة عشان لو مجتش منزعلش عليها .. لان مش هينفع ناخد حاجة مش بتاعنا ولا ناخد حاجة بالعافية .. وساعات مبيكونش فى الامكان اننا نمد ايدينا نطول الحاجة اصلا .. فبتفضل حلم بعيد .. ساعات بندايق من نفسنا اللى خلتنا نفكر فى الحاجة ونتمناها .. بس كل دا بيروح وبيفضل حاجة واحدة بس .. الحلم اللى متحققش

مرسي ياقمر
انا حلمي الوحيد اني اتخرج من ثانويه بخير

ربنا يكرمنا وناخذ الابتدائيه هههههههه

انا كمان حلمى انى اجيب مجموع ان شاء الله

» احذر ان تكون السبب في دموع حواء
» حتى لا يموت الحلم ..!!
» حصريا كليب محمد قماح وشباب مصريين الحلم المصري 2011